ამბროლაურის მუნიციპალიტეტის მერიაში მორიგი სამუშაო შეხვედრა გაიმართა, რომელსაც მუნიციპალიტეტის მერი ზვიად მხეიძე უძღვებოდა.
შეხვედრას მერის მოადგილე მამუკა ხიმშიაშვილი და მერიის სტრუქტურული ერთეულების წარმომადგენლები ესწრებოდნენ. ზვიად მხეიძემ მწუხარება გამოთქვა გუდაურში მომხდარი უბედური შემთხვევის გამო და სამძიმარი გამოუცხადა დაღუპულთა ოჯახებს. თათბირზე ისაუბრეს სხვადასხვა სფეროში არსებულ მდგომარეობაზე და დეტალურად განიხილეს ის საჭიროებები, რომლებიც მოსახლეობის მიერ ფიქსირდება. ძირითადი ყურადღება დაეთმო ქალაქის იერ-სახის მოწესრიგებას, ტურისტულად მიმზიდველი ადგილების დასუფთავებას, დამატებითი ნაგვის ურნების განთავსებას, სოფლებში ხარისხიანი სასმელი წყლის მიწოდების გაუმჯობესებისთვის საჭირო პროცედურებს, საგზაო ინფრასტრუქტურის მიმართულებით მიმდინარე სამუშაოებს და ამ დროისთვის არსებულ სხვა მნიშვნელოვან საკითხებს. სამუშაო შეხვედრაზე, სამსახურების ხელმძღვანელებმა დაგეგმილი აქტივობები წარმოადგინეს. ინფრასტრუქტურისა და არქიტექტურული ზედამხედველობის სამსახურების წარმომადგენლებმა დეტალურად ისაუბრეს პროექტების მიმდინარეობაზე და აღნიშნეს, რომ აქტიური სამუშაოები ხორციელდება როგორც ,,სოფლის მხარდაჭერის პროგრამის” ფარგლებში დაგეგმილ, ისე სხვადასხვა მიმართულებით განსახორციელებელ ინფრასტრუქტურულ პროექტებზე. ასევე განიხილეს სოციალურ და ჯანდაცვის სფეროში არსებული პროგრამების მიმდინარეობა, რომლის ფარგლებშიც, მიმდინარე წელს, მუნიციპალიტეტში მცხოვრებ 1000-მდე მოქალაქეს უკვე გაეწია საჭირო დახმარება. აღსანიშნავია, რომ ამბროლაურში გაიხსნა დიალეზის ცენტრი, რაც პაციენტებს საშუალებას მისცემთ ადგილზე მიიღონ საჭირო მომსახურება. მერმა, სამსახურების ხელმძღვანელებს კონკრეტული დავალებები მისცა და პრობლემურ საკითხებზე დროული რეაგირებისკენ მოუწოდა.