ამბროლაურის მუნიციპალიტეტში მიმდინარე პროგრამებთან დაკავშირებით, საქართველოს წითელი ჯვრის საზოგადოების ამბროლაურის ფილიალში სამუშაო შეხვედრა გაიმართა, რომელსაც მერიის სოციალური და ჯანდაცვის ხელმძღვანელი მარიკა დვალი, ამავე სამსახურის თანამშრომლებთან და ,,წითელი ჯვრის“ წარმომადგენლებთან ერთად ესწრებოდა.
აღსანიშნავია, რომ ამბროლაურში ,,პროფესიული შინ მოვლის პროექტი” ხორციელდება, რომელიც ითვალისწინებს განსაკუთრებული საჭიროების მქონე პირების სამედიცინო, საბაზისო და სოციალურ მოვლას ადგილზე, მათი ცხოვრების ხარისხის გაუმჯობესების მიზნით. ბენეფიციარებს ემსახურება მაღალკვალიფიციური მულტიდისციპლინირებული გუნდი (ექიმი, ექთანი, ექთნის ასისტენტი, სოციალური მუშაკი, ოჯახის დამხმარე, ტექნიკური ასისტენტი).
აღნიშნულის გარდა, წითელი ჯვრის ორგანიზაციასთან თანამშრომლობით, მუნიციპალიტეტში ბევრი მნიშვნელოვანი აქტივობა ხორციელდება, რომლებიც ითვალისწინებს კატასტროფებისთვის მზადება-რეაგირებას, შინმოვლისა და საგანგებო სიტუაციების დროს ჯანდაცვის სერვისების ხელმისაწვდომობის გაუმჯობესებას, სხვადასხვა მოწყვლადი ჯგუფების საჭიროებებზე დაფუძნებულ მხარდაჭერას, მოსახლეობაზე ჰუმანიტარული ამანათების მიწოდებას და საზოგადოების საჭიროებებიდან გამომდინარე სხვა სახის ღონისძიებების განხორციელებას.
მერიის წარმომადგენლებმა მადლობა გადაუხადეს ,,წითელი ჯვრის ორგანიზაციას“ მიმდინარე საქმიანობისთვის და მომავალში ერთობლივად განსახორციელებელი პროექტები განიხილეს.