ამბროლაურში მხატვრული ტანვარჯიშის წრე გაიხსნა
სპორტისა და ჯანსაღი ცხოვრების წესის პოპულარიზაციის ფარგლებში, ამბროლაურში მხატვრული ტანვარჯიშის წრე ამოქმედდა.
ვარჯიშები ამბროლაურის სასპორტო სკოლაში ჩატარდება, წრეს ხელმძღვანელობენ პროფესიონალი მწვრთნელები – ასმათი ჯაფარიძე და სალომე ბურდილაძე.
გახსნის ღონისძიებას დაესწრნენ ამბროლაურის მუნიციპალიტეტის მერი ზვიად მხეიძე, მერის მოადგილე თამარ ქევანაშვილი, განათლების, კულტურის, ძეგლთა დაცვის, სპორტის და ახალგაზრდობის საქმეთა სამსახურის ხელმძღვანელი მიხეილ დალაქიშვილი და რაჭა-ლეჩხუმისა და ქვემო სვანეთის სახელმწიფო რწმუნებულის აპარატის ხელმძღვანელი მარიკა დვალი. ხელისუფლების წარმომადგენლებმა ახალგაზრდებს წარმატებები უსურვეს და მუნიციპალიტეტში სპორტული საქმიანობის განვითარებაზე ისაუბრეს.
“მხატვრული ტანვარჯიში არა მხოლოდ ფიზიკური განვითარების, არამედ დისციპლინის, შრომისმოყვარეობისა და ესთეტიკის შესანიშნავი კომბინაციაა. სასიამოვნოა, რომ ჩვენი მუნიციპალიტეტის მცხოვრებ პატარა გოგონებს უკვე აქვთ საშუალება ჩაერთონ ამ ულამაზეს სპორტში”- აღნიშნა ზვიად მხეიძემ.
ამბროლაურის მუნიციპალიტეტი მომავალშიც გააგრძელებს ახალგაზრდობის სპორტით დაინტერესებისა და შესაბამისი შესაძლებლობების შექმნის ხელშეწყობას.